Kryeministri Albin Kurti ka ngushëlluar familjen Fehmiu me rastin e shkuarjes në amshim e profesor Arsim Fehmiu, në moshën 91 vjeçare.
Kurti në postimin e tij në Facebook ka thënë se Arsim Fehmiu ishte një nga themeluesit e Fakultetit të Kulturës Fizike në Universitetin e Prishtinës i cili ndër vite punoi dhe kontribuoi në edukimin dhe arsimimin e gjeneratave në fushën e sportit. Mësues, arsimtar dhe profesor i cili dha shumë në zhvillimin e sportit të Kosovës dhe jo vetëm.
Me mbi shtatë dekada kushtuar sportit, puna dhe kontributi i profesor Arsim Fehmiu mbetet shtyllë e zhvillimit të deritanishëm të sportit në vend dhe inspirim për gjeneratat e reja.
Në këtë ditë të vështirë për familjen, u shpreh ngushëllimet më të sinqerta për humbjen e profesorit Fehmiu. Ngushëllime edhe miqve dhe kolegëve të tij në fushën e sportit.
Kujtimi për Arsim Fehmiun do të mbetet i paharruar sikurse edhe veprimtaria e tij e çmuar.
