Kryeministri i Kosovës, Albin Kurti ka njoftuar se me 55 vota për, vetëm 8 kundër dhe 3 abstenime, Kosova fiton kandidaturën për organizimin e Lojërave Mesdhetare Prishtina 2030, që njëherësh do të jetë ngjarja më e madhe sportive e mbajtur në Republikën tonë, kështu ka vendosur Asambleja e Përgjithshme e Komitetit Ndërkombëtar të Lojërave Mesdhetare, që u mbajt në Heraklion të Greqisë.
Kryeministri Kurti në postimin e tij në Facebook ka thënë se ky është një lajm i madh për Kosovën dhe një arritje e jashtëzakonshme për të gjithë ne, shpreh mirënjohjen e përzemërt për të gjithë ata që kanë mbështetur vizionin tonë për të ardhmen e vendit dhe të gjithë rajonit të Mesdheut dhe se e vlerësojmë me gjithë zemër mundësinë që na është dhënë që të bëjmë bashkë në vendin tonë, në Kosovë 26 shtetet anëtare nga tre kontinentet.
Ky rast është një simbol i shquar i përkushtimit tonë për të krijuar një të ardhme më të mirë, ku e kaluara nderohet, e tashmja festohet dhe e ardhmja formësohet nga një ndjenjë e thellë bashkimi.
Teksa nisim këtë rrugëtim drejt Prishtinës 2030, më lejoni t’i uroj të gjithë në Kosovë, veçanërisht sportistët tanë dhe komunitetin tonë sportiv. Kjo arritje është rezultat i punës së palodhur të njerëzve në qeverinë tonë dhe në Komitetin Olimpik të Kosovës. Ky rezultat është një kurorë ndërkombëtare mbi zotimin rekord financiar dhe operacional në nivel kombëtar.
Le të kujtojmë se nuk bëhet fjalë vetëm për medalje dhe rekorde, por edhe për nxitjen e miqësive, shkëmbimeve kulturore dhe frymën e unitetit që kapërcen kufijtë.
Le të fillojnë përgatitjet, dhe unë ju garantoj se këto lojëra do të jenë një dëshmi e ndritur e madhështisë së Kosovës dhe rajonit të Mesdheut.
Ju faleminderit për mbështetjen dhe nderin e madh që i keni dhënë vendit tonë dhe kryeqytetit tonë, Prishtinës për organizimin e Lojërave Mesdhetare 2030.
Ia dolëm! Faleminderit shumë.
