Presidentja e Republikës së Kosovës, Vjosa Osmani Sadriu, në Ambasadën e Republikës së Kosovës në Romë, ia dorëzoi kardinalit të vetëm shqiptar, të mbijetuarit të diktaturës komuniste në Shqipëri, kardinalit Ernest Simoni, medaljen presidenciale “Shën Tereza”.
Kjo medalje i qe ndarë shtatorin e shkuar, në kuadër të “Ditëve të Nënë Terezës”, për qëndresën e palëkundur ndaj diktaturës komuniste dhe veprimtarisë së gjatë në shërbim të paqes e të lirisë.
Duke i shprehur mirënjohje të thellë, Presidentja Osmani tha: “Kardinal Simonit i mbetemi përherë mirënjohës dhe falënderues për kultivim të vlerave njerëzore dhe kujdesin që ai e tregon në secilin takim dhe secilën ngjarje ndaj Kosovës”, thuhet në faqen zyrtare të Presidentes së Kosovës.
