Nga e premtja Kosova për herë të parë do të jetë nikoqir i një prej ngjarjeve më të rëndësishme kulturore ndërkombëtare, bienales nomade “Manifesta”. Mbështetur nga Ministria e Kulturës, Rinisë dhe Sportit, Manifesta sivjet ka një program 100 ditor, që përfshin 25 lokacione, 55 intervenime artistike dhe 102 pjesëmarrës vendor e ndërkombëtarë.
Ministri i Kulturës, Hajrulla Çeku ka vizituar lokacionet ku janë bërë intervenime, hapësirat artistike që së shpejti do të hapen për publikun.
“Dy ditë para hapjes zyrtare të Bienales Nomade Evropiane, Manifesta 14, bashkë me anëtarë të kabinetit dhe drejtuesit e Manifesta vizituam lokacionet ku janë bërë intervenime, hapësirat artistike që së shpejti do të hapen për publikun.
Gjithçka është gati për fillimin e një prej ngjarjeve më të mëdha të kulturës në vend. Ajo që e veçon nga bienalet në shtetet tjera të botës është pjesëmarrja e lartë e artistëve vendorë, rreth 40 përqind e artistëve pjesëmarrës janë nga Kosova dhe rajoni.
Jam veçanërisht i lumtur me transformimin e objekteve të trashëgimise kulturore në shërbim të ekspozimit të artit, gjithmonë duke ruajtur origjinalitetin dhe historinë, por duke shtuar vlerën e tyre artisike”, ka thënë Çeku në postimin e tij në Facebook.
