Zëvendëskryeministrja dhe ministrja e Punëve të Jashtme dhe Diasporës, Donika Gërvalla-Schwarz, priti në takim ambasadorin e Republikës së Turqisë në vendin tonë, Tunç Angili.
Ministrja Gërvalla fillimisht i uroi mirëseardhje ambasadorit Angili dhe theksoi raportet e shkëlqyera mes dy vendeve tona, të cilat duhet të avancohen më tej.
Ajo falënderoi Ambasadorin dhe shtetin turk për ndihmën e dhënë Republikës së Kosovës në shumë fusha, veçanërisht në fushën e trajnimeve ushtarake.
Ministrja Gërvalla gjithashtu falënderoi ambasadorin Angili për mbështetjen e Turqisë në anëtarësimin e Republikës së Kosovës në Këshillin e Evropës, integrimin në strukturat atlantike dhe ndihmën e ofruar në sigurimin e njohjeve të reja.
Gjatë takimit u diskutuan edhe tema të tjera të rëndësishme për Republikën e Kosovës, siç janë proceset aktuale të reformave që vendi po kalon, sfidat e ardhshme në rrugën e integrimeve euro-atlantike, si dhe thellimi i marrëdhënieve bilaterale dhe ekonomike me Republikën e Turqisë.
Një temë e bisedës ishte gjithashtu situata e sigurisë dhe stabilitetit rajonal. Republika e Kosovës angazhohet në ruajtjen e paqes dhe stabilitetit rajonal, duke zbatuar detyrimet e saj kushtetuese brenda territorit të saj.
Ministrja Gërvalla theksoi se rrëmbimi i policëve tanë në detyrë brenda territorit të Kosovës është një akt agresioni i Serbisë dhe shkelje e normave ndërkombëtare. Ajo kërkoi që komuniteti ndërkombëtar ta dënojë këtë akt dhe të bëjë presion për lirimin e policëve tanë sa më shpejt dhe pa kushte, thuhet në postimin në Facebook të MPJD-së.
