Të premten në orën 10:00, Instituti për Studime në Edukim, EdGuard, do të prezantojë raportin e projektit hulumtues “Kuptimi dhe Qëndrimi i të Rinjve ndaj Qytetarisë”. Kjo ngjarje do të mbahet në Qendrën e Konferencave “Orion”, në Prishtinë.
EdGuard është institut i sapothemeluar, i përkushtuar në hulumtim dhe avokim në fushën e edukimit. Qëllimi i institutit EdGuard është të nxisë debatin për edukim duke ofruar rekomandime të bazuara në evidencë, për ndryshim të politikave në edukim, dhe jo vetëm.
Valbona Makovci nga instituti EdGuard, tregon për KosovaLive qëllimin e projektit “Kuptimi dhe Qëndrimi i të Rinjve ndaj Qytetarisë”.
“Qëllimi i projektit është të rishikohet se si shkollat i përgatisin të rinjtë për rolin e tyre qytetar. Është tentuar të dëshmohet roli që shkollat dhe kurrikula ka në të ndërtuarit e bindjeve qytetare te të rinjtë. Të qenurit i pajisur me dije për qytetarin paraqet një indikator pozitiv për përfshirjen e të rinjve në shoqëri”.
Ky hulumtim ka përfshirë një mostër prej 1200 nxënësish të shkollave të mesme, të moshës 15 deri në 18 vjet. Nxënësit kanë qenë subjekt i një pyetësori të standardizuar me rreth 200 pyetje, që ka matur njohuritë, bindjet dhe të kuptuarit e tyre për qytetarinë.
Sipas planprogramit, përpos prezantimit të raportit do të ketë edhe diskutim të hapur me të pranishmit dhe autoritetet vendimmarrëse.
Valbona Makovci thotë se përfaqësuesit e institutit EdGuard besojnë se të gjeturat e këtij hulumtimi ofrojnë rezultate shumë interesante për opinionin e gjerë.
“Përmes këtyre rezultateve është rikonfirmuar rëndësia që qytetaria ka mbi zhvillimin e të rinjve si individë të përgjegjshëm të së ardhmes”, shton ajo.
/Medina Mehmeti – Vajzë Dëgjohu/
