Kryeministri në detyrë i Republikës së Kosovës, Avdullah Hoti, ka vizituar kompanitë “Arkos”, “Powerpack” dhe “Shehu”, në Parkun e Biznesit në Drenas, me ç’rast ka theksuar mbështetjen e Qeverisë për zhvillimin e bizneseve, duke vlerësuar se zhvillimi i sektorit privat është shumë i rëndësishëm për zhvillimin ekonomik të vendit.
“Është kënaqësi që të vizitosh kompani vendore dhe investitorë të jashtëm që janë vendosur këtu dhe prodhojnë me standardet më të larta të cilësisë, prodhime këto me eksport të siguruar në vende të BE-së”, tha kryeministri Hoti.
Gjatë vizitës në Parkun e Biznesit në Drenas, kryeministri Hoti theksoi se, janari i këtij viti ka qenë më i mirë se janari i vitit 2020, që nënkupton se Kosova po i kthehet gradualisht normalitetit.
Vizitën në Drenas, kryeministri Hoti e përmbylli me një takim të përbashkët me të gjithë përfaqësuesit e bizneseve dhe iu premtoi mbështetjen e Qeverisë dhe krijimin e lehtësirave për Qasje në Fondin për Garanci Kreditore, thuhet në komunikatën për media e Zyrës së Kryeministrit.
