Me rastin e Ditës Botërore të Shëndetit Mendor, bashkë me Departamentin e Psikologjisë të Fakultetit Filozofik, ministrja e Arsimit, Arbërie Nagavci ka njoftuar se kanë nënshkruar Marrëveshje Bashkëpunimi për avancimin e politikave arsimore dhe fuqizimin e zhvillimit e të mirëqenies në institucionet edukativo-arsimore.
Nagavci në postimin e saj në Facebook ka thënë se me këtë synojnë të kontribuojnë në avancimin e cilësisë së sistemit arsimor me fokus në sigurimin e ambienteve të përshtatshme të mirërritjes, zhvillimit dhe edukimit të mirëfilltë të të gjithë qytetarëve.
Ndër të tjera, përmes këtij bashkëpunimi, profesorët dhe hulumtuesit nga Departamenti dhe Instituti i Psikologjisë do të mbështesin MASHTI dhe institucionet arsimore duke ofruar ekspertizën në këto fusha:
Monitorimin dhe vlerësimin e nevojave të shkollave;
Parandalimin dhe adresimin e dhunës dhe ngacmimeve në shkolla;
Orientimin në karrierë;
Dizajnimin, implementimin dhe vlerësimin e programeve të ndryshme psiko-sociale dhe pedagogjike;
Fuqizimin e kapaciteteve të mësimdhënësve me teknika të reja të mësimdhënies, të menaxhimit të klasës dhe identifikimit të nevojave individuale të nxënësve;
Identifikimin e nevojave, mbështetjen në zhvillimin të psikologëve të shkollave dhe avancimin e rolit të psikologut të shkollës;
Profesorët e Departamentit të Psikologjisë dhe hulumtuesit shkencor të Institutit të Psikologjisë do të realizojnë projekte hulumtuese dhe monitoruese në bashkëpunim me institucionet edukativo-arsimore në identifikimin e nevojave të të gjitha niveleve dhe realizimin e programeve intervenuese në përputhje me nevojat e identifikuara.
Shëndeti mendor ka nevojë për vëmendjen tonë!
