Ministria e Shëndetësisë ka bërë të ditur se dhjetëra qytetarë të Prishtinës i janë përgjigjur sot pozitivisht aktivitetit për vaksinimin kundër gripit sezonal dhe kundër COVID-19 me dozat bivalente përforcuese, në kuadër të “Karvanit të vaksinimit”.
Zëvendësministrja e Shëndetësisë Dr. Dafina Gexha Bunjaku ka vizituar sot ekipet e vaksinimit, të cilat përmes Karvanit të vaksinimit u kanë mundësuar qytetarëve marrjen e vaksinave, duke i përgëzuar për punën dhe inkurajuar njëkohësisht qytetarët që të vaksinohen si kundër Gripit sezonal, ashtu dhe kundër COVID-19.
Karvani i vaksinimit është organizuar nga MSh dhe IKSHPK, me mbështetjen e OBSh-Zyra në Prishtinë dhe nga data 22 dhjetor 2022 e deri më sot, si një aktivitet shtesë u ka ndihmuar qytetarëve për ta kuptuar sa më mirë rëndësinë e vaksinimit, promovimin e sjelljeve parandaluese dhe masave të shëndetit publik.
MSh falënderon të gjithë të angazhuarit në këtë proces, ekipet e vaksinimit dhe komunat përkatëse ku Karvani po zhvillohej prej një muaji, thuhet në postimin në Facebook të MSh-së.
