Me iniciativën e të dy komisioneve për Armë të Vogla dhe të Lehta (AVL) dhe me mbështetjen e Programit për Siguri (KSSP) të UNDP-së, në Tiranë është mbajtur takimi bilateral në mes të Komisioneve Shtetërore për AVL, të Kosovës dhe Shqipërisë.
Kryesues të këtyre dy komisioneve, Zëvendësministri i Punëve të Brendshme të Republikës së Kosovës, z. Blerim Gashani dhe Zëvendësministri i Brendshëm i Republikës së Shqipërisë, z. Besfort Lamallari, treguan se qëllimi i takimit të përbashkët ishte diskutimi dhe shkëmbimi i ideve për një projekt-propozim të përbashkët në kuadër të thirrjes për propozime nga fondi MPTF, që do të kontribuonte në avancimin dhe unifikimin e njohurive për fushën e AVL-ve në përgjithësi për zyrtarët institucionalë nga Kosova dhe Shqipëria.
Gjatë këtij takimi u propozua projekti i përbashkët në mes të Kosovës dhe Shqipërisë: “Qasje e Përbashkët Institucionale e Integruar Ndërkufitare ndaj luftimit të Trafikimit të Armëve Ilegale dhe ndaj AVL-ve”. Qëllimi i projektit ndër të tjera është që deri në vitin 2024, të reduktohen ndjeshëm flukset e paligjshme të armëve të zjarrit, municioneve dhe eksplozivëve, brenda dhe përtej Ballkanit Perëndimor, parandalimi i trafikimit (kontrabanda, tregtia e paligjshme dhe tranziti) të armëve të zjarrit dhe eksplozivëve, nëpërmjet përmirësimit të proceseve, pajisjeve dhe trajnimit të njësive të targetuara të zbatimit të ligjit, etj.
Të dy zëvendësministrat e brendshëm, Gashani dhe Lamallari, mbështetën këtë iniciativë të përbashkët dhe kërkuan nga anëtarët e të dy komisioneve shtetërore të përgatiten në identifikimin e nevojave të secilit vend si dhe fushat e interesit të përbashkët.
Kryesuesit e të dy komisioneve nënvizuan se kjo iniciativë duhet të jetësohet në praktikë dhe kërkuan nga përfaqësuesit e zyrave të UNDP-së në vendet respektive, që në një afat sa më të shpejtë të merren me shqyrtimin, koordinimin dhe identifikimin e modaliteteve më të mira të zbatimit praktik të projektit të përbashkët, duke u siguruar dhe koordinuar ngushtë me SEESAC, OSBE, UNODC dhe akterët tjerë ndërkombëtarë, që mbështesin institucionet në zbatimin e udhërrëfyesit, në mënyrë që të evitojnë duplifikimet e aktiviteteve, thuhet në komunikatën për media e MPB-së.
